20歲都未夠嘅少女，已經第N次睇陰道痕。對佢印象深刻係因為幾個月前，佢輕輕鬆鬆咁話啱啱睇完社會衛生診所，驗出有性病跟住食晒藥。不過仲有D痕所以之前過嚟睇。
今日一模一樣，繼續唔帶套，繼續痕。我叫佢要再驗性病。佢以為中過一次性病就以後都唔會中。問佢有冇叫之前個伴侶驗性病佢話冇。我都費事問佢係唔係同之前嗰個人繼續上床。
其實佢都幾靚女，仲好有禮貌添。點解要咁呢？個男仔話帶套就代表唔愛你？你覺得帶到唔舒服？你做特別服務嘅行業？我都唔問啦。佢有佢嘅原因掛？
問佢使唔使攞事後丸又話唔使，又唔會驚大肚。性教育我講咗少少，唔再多講。上次講嗰一次，衛生診所一定有講。要聽嘅就聽咗，要做嘅就已經做咗。
我有好多朋友想生BB都好困難，千方百計搵名醫幫手。自己要吉好多肚皮針，用盡心思精神金錢先至可能製造到小生命。經歷每個月嘅期待/失望咁無限輪迴。
少女，我唔想你搞到盆腔炎之後好難生BB跟住後悔。
不過你太年輕，你唔會明我依家講乜嘢。

Search